इटालीकी प्रधानमन्त्री जर्जिया मेलोनी डिपफेकको सिकार भएकी छन् । डिपफेक पोर्न भिडियो बनाएर अनलाइनमा पोस्ट गरेका आरोपीसँग उनले एक लाख युरो क्षतिपूर्ति माग गरेकी छन् ।
दुई व्यक्तिले मेलोनीको अनुहार वयस्क फिल्म स्टारको अनुहारमा हालेर अमेरिकी पोर्न वेबसाइटमा अपलोड गरेको दाबी गरिएको छ । आरोपी बाबु र छोरा भएको बताइएको छ । छोराको उमेर ४० वर्ष र बाबुको उमेर ७३ वर्ष रहेको छ । उनीहरुले मेलोनीको अश्लील भिडियो बनाएको बताइएको छ । मेलोनीले दुवै आरोपी विरुद्ध मानहानिको मुद्दा दायर गरेकी छन् ।
दुवै आरोपीलाई पक्राउ गरिएको छ । सो भिडियो सन् २०२२ मा मेलोनी इटलीको प्रधानमन्त्री बन्नु अघिको हो । उक्त भिडियो अहिलेसम्म लाखौं पटक हेरिएको छ । यो मामिलामा मेलोनीले जुलाई २ मा सासरी अदालतमा बयान दिने बताइएको छ ।
क्षतिपूर्तिको माग गर्नु प्रतिकात्मक कारबाही भएको प्रधानमन्त्री मेलोनीको कानूनी टोलीले बताएको छ । मेलोनीले क्षतिपूर्तिको सम्पूर्ण रकम हिंसा पीडित महिलाहरूको सहयोगमा दान गर्ने बताइएको छ ।
क्षतिपूर्तिको माग हिंसाको सिकार भएका अन्य महिलालाई पनि सन्देश भएको मेलोनीका वकिल मारिया जिउलिया मारोन्ग्युको भनाइ छ । हिंसाको सिकार भएका महिलाले आवाज उठाउन डराउन नहुने मेलोनीको भनाइ छ ।
