काठमाडौं । मनिषा कोइरालाद्वारा अभिनित एवं सञ्जयलीला भन्साली निर्देशित नेटफ्लिक्स सिरिज ‘हीरामण्डी : द डायमण्ड बजार’ वैशाख १९ गते रिलिज हुने भएको छ ।
भन्सालीको यो डिजिटल डेब्यु सिरिज मे १ (वैशाख १९) गते रिलिज हुने घोषणा गरिएको हो । मनिषा कोइराला लगायतको शीर्ष भूमिका रहेको फिल्मले सन् १९४० को भारतीय स्वतन्त्रता संग्रामको पृष्ठभूमिमा प्रेम, शक्ति र स्वतन्त्रताको कथा रहेको छ ।
सिरिजमा मनिषासहित सोनाक्षी सिन्हा, अदिती राव हैदरी, ऋचा चड्ढा, सञ्जीदा शेख र शर्मीन सहगल जस्ता कलाकार छन् । पोस्टर र गीतपछि प्रदर्शन मिति तय गरिएको छ ।
मुम्बईमा आयोजित कार्यक्रममा यो वेब–सिरिजको रिलिज मिति घोषणा गरिएको हो । यसको नाम र मितिलाई आकाशमा ड्रोनमार्फत लेखिएको थियो । उक्त रोमाञ्चक दृश्य हेर्न मनिषा, सोनाक्षी, ऋचा लगायत त्यहाँ उपस्थित थिए ।
हैदरीले अभिनेता सिद्धार्थसँग गोप्य विवाह गरेको खबर पनि आइरहेको छ । उनको विवाहको खबर यो वेब–सिरिजको घोषणा कार्यक्रममा गरिएको थियो । यसको खुलासा कार्यक्रम आयोजक सचिन आफैंले गरेका छन् ।
