जनकपुरधाम:मधेश सरकारको योजनाहरू खरिद विक्री गर्ने गरिएको निष्कर्ष निकाल्दै विरोध गर्ने जनमत पार्टीले निर्णय गरेको छ ।
राष्ट्रिय अध्यक्ष डा. सीके राउतको उपस्थितिमा शुक्रवार जनमत पार्टी मधेश प्रदेश संसदीय दलको बसेको बैठकबाट यस्तो निर्णय गरिएको हो । उक्त बैठकले योजना खरिद विक्रीबारे सरकारको ध्यानाकर्षण र विरोध गर्ने गरिएको दलका नेता महेश प्रसाद यादवले जानकारी दिए ।
मधेश प्रदेशसभाको बैठक लामो समयदेखि अवरुद्ध छ । सो विषयमा पनि जनमतको संसदीय दलले छलफल गरेको छ । दलका नेता यादवले भने, ‘लामो समयसम्म सदन अवरुद्ध राख्नु हुँदैन् । सरकार गम्भीर हुनुपर्छ । यस विषयमा पनि सरकारको ध्यानाकर्षण गराउने निर्णय गरेका छौँ ।’
उनले प्रदेशको विभिन्न स्थानमा लागेको आगलागी प्रभावितहरूको तथ्याङ्क सङ्कलन गरी अभिलम्ब ठोस राहत प्याकेज उपलब्ध गराउन र खानेपानीको समस्या समाधान गर्न सरकारसँग माग गर्ने निर्णय पनि भएको जानकारी दिए ।
