जनकपुरधाम:भारतका समाजवादी पार्टीका अध्यक्ष तथा लोक सभा सदस्य अखिलेश यादवले भागवान रामको जन्मभुमि अयोध्यादेखि माता जानकीको जन्मभुमि जनकपुरधाम सम्म एक्सप्रेस वे(फास्ट ट्रयाक)को बनाउन माग गरेका छन् ।
ंमंगलवार भारतीय संसदमा सम्बोधन गर्दै अध्यक्ष यादवले यस्तो माग गरेका हुन् । उनले भने,‘प्रधानमन्त्री नरेन्द्र मोदी केहि वर्ष अघि जनकपुरधामको भ्रमणको क्रममा हरियो झण्डा देखाएर अयोध्या –जनकपुरधाम मैत्रि बस सेवाको उद्घाटन गरेका थिएँ । जनकपुरधामबाट ३५ जना बसमा अयोध्या पनि आएका थिएँ । तर म त्यतिवेला नै जनकपुरधामदेखि अयोध्या सम्म एक्सप्रेस वे बनाउनुपर्छ भनेर माग गरेको थिएँ ।’
‘अयोध्यादेखि जनकपुरधाम सम्मको बाटो सहज छैन, ट्राफिक चापको कारण यात्रुहरुलाई सास्ती झेल्नुपर्ने वाध्यता हुन्छ,अध्यक्ष यादवले अगाडी भने,‘दुवै धार्मिक स्थल हो । एक्सप्रेस वे निर्माण भएको खण्डमा दुवै देशका नागरिकलाई यात्रा गर्न सहजता प्रदान हुन्छ ।’
भारतको उत्तर प्रदेशको कन्नौजबाट भारतीय लोकसभा सदस्यमा निर्वाचित अध्यक्ष यादवले लोकसभामा अयोध्यादेखि जनकपुरधाम सम्म एक्सप्रेस वेको माग गरिरहदाँ सांसदहरुले टेबुल ठोकेर समर्थन जनाएका थिए ।
२८ बैशाख २०७५ मा भारतीय प्रधानमन्त्री नरेन्द्र मोदीले जनकपुरधामको भ्रमण गरेका थिए । भ्रमणका क्रममा नेपालका तत्कालिन प्रधानमन्त्री केपी शर्मा ओली र भारतीय प्रधानमन्त्री मोदीले संयुक्त रुपमा हरियो झण्डा देखाएर जनकपुरधाम– अयोध्या मैत्रि बस सेवाको उद्टान गरेका थिए ।
जनकपुरधाम–अयोध्या रेल चाँडै संचालनमा आउने
जनकपुरधाम अयोध्या रेल सेवा चाँडै नै संचालनमा आउने भएको छ । नेपालको भौतिक मन्त्रालय तथा नेपाल रेल्वे कम्पनीले जनकपुरधामदेखि भारतको अयोध्यासम्म रेल संचालनको तयारी अन्तिम चरणमा रहेको जनाइएको छ ।
नेपाल रेल्वे कम्पनी लिमिटेडका महाप्रबन्धक निरञ्जन झाले सेवा सञ्चालनका लागि समय तालिका सार्वजनिक गरिएको र अब चाँडै कार्यान्वयनमा ल्याउने तयारी भईरहेको जानकारी दिए । उनले २०८० पुस १ गते भौतिक मन्त्रालय मार्फत जनकपुरधामबाट अयोध्या हुँदै दिल्लीसम्मका लागि रेल सेवा संचालनमा ल्याउने तयारी गरिएपनि पहिलो चरणमा अयोध्यासम्म मात्रै संचालनमा आउने बताए । महाप्रबन्धक झाका अनुसार पहिलो चरणमा अयोध्यासम्म मात्रै रेल संचालनमा ल्याउने तयारी गरिएपनि दिल्लीसम्म रेल सेवा संचालन गर्नका लागि पहल जारी राख्ने प्रतिवद्धता व्यक्त गरे । उनले सप्ताहको एक दिन अयोध्यासम्म जनकपुरधामबाट रेल गुड्ने तयारी स्वरुप समय तालिका समेत सार्वजनिक गरि सकिएको बताए ।
रेल सेवा प्रत्येक शनिबार दिनको १ः३० बजे जनकपरधामबाट खुल्ने र ४ बजे बिहान अयोध्या पुग्ने तथा सोही रेल साँझ ५ बजे अयोध्याबाट फर्किएर अर्को बिहान ७ः३० बजे जनकपुरधाम पुग्ने गरी तालिका सार्वजनिक गरिएको उनले जानकारी दिए ।
‘जनकपुरधाम–अयोध्या रेल सञ्चालनका लागि समय तालिका सार्वजनिक गरेका छौँ, अब सोहीअनुसार छिट्टै सेवा सुरु गर्ने तयारीमा छौँ । उद्घाटनको समय तालिका मिलाउन लागिएको छ, समय मिल्नासाथ औपचारिक घोषणा गर्नेछौँ ।’
यता उनले भंगहादेखि बर्दिवाससम्मको रेल्वे लिक निर्माणको कार्य चाँडै शुरु गरिने बताए । मुआब्जा वितरणको काम ८५ प्रतिशतसम्म सम्पन्न भई सकेको र बाँकी १५ प्रतिशतमा विवादहरु रहेकाले सोको समाधानका लागि पहल भईरहेको बताए । उनले मन्त्रालयबाटै त्यो विवाद समाधान गर्ने पहल भईरहेकाले चाँडै नै विवाद समाधान गरेर कातिक महिनादेखि निर्माण कार्य अगाडी बढाइने सम्भावना रहेको दिए । त्यस्तै कार्गो रेल सेवा संचालनका लागि भारत सरकारसंग समन्वयका लागि पहल भईरहेको जानकारी दिए ।
