जनकपुरधाम : स्थलमार्ग भएर जनकपुरधाम आएका पर्यटकहरुलाई जनकपुरधाम उद्योग वाणिज्य संघले स्वागत तथा सम्मान गरेको छ । ४५औँ विश्व पर्यटन दिवसको अवसर पारेर जनकपुरधाम उद्योग वाणिज्य संघको आयोजनामा आयोजित सप्ताहव्यापी कार्यक्रम अन्तर्गत स्थल मार्ग भएर आएका पर्यटकहरुलाई स्वागत सम्मान गरिएको हो । रेलबाट जनकपुरधाम आएका पर्यटकहरुलाई जउवा संघका नवनिर्वाचित अध्यक्ष सुरेन्द्र भण्डारीले स्वागत गरेका थिए । जनकपुरधाममा पर्यटकहरुलाई वास बस्ने गरी टिकाउने उद्देश्यले यस्ता कार्यक्रमहरुको आयोजना गरिएको अध्यक्ष भण्डारीले बताए ।
सप्ताहव्यापी कार्यक्रम अन्तर्गत धार्मिक पदयात्रा, ५२ कुट्टी ७२ कुण्ड अवलोकन दर्शन, सरसफाइ तथा वृक्षारोपण, पर्यटन प्रबद्र्धन सम्बन्धि अन्तरक्रिया कार्यक्रम, अतिथि सत्कार सम्बन्धि जनचेतना कार्यक्रम यस अघि नै गरि सकिएको छ । अब हवाई मार्ग तथा जटही तथा भिट्ठामोड नाकाबाट आउने पर्यटकहरू लाई स्वागत सम्मान कार्यक्रम गर्ने र अन्तिम दिन वृहत् कला संस्कृति झल्किने प्रभातफेरि कार्यक्रमको आयोजना गरिने छ ।
