जनकपुरधाम : नागार्जुन नगरपालिकाका निलम्बित मेयर मोहनबहादुर बस्नेतविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ ।
बस्नेतमाथि सार्वजनिक पदको दुरुपयोग गर्दै ८ करोड ६९ लाख रुपैयाँ गैरकानुनी सम्पत्ति आर्जन गरेको आरोप लगाइएको छ । अख्तियारको अनुसन्धानमा बस्नेतले कुल २८ करोड ६५ लाख रुपैयाँको सम्पत्ति जोडेको पाइएको छ । जसमध्ये उनले १९ करोड ९५ लाख रुपैयाँमात्र कानुनी रुपमा आर्जन गरेका थिए । बाँकी ८ करोड ६९ लाख रुपैयाँ भने भ्रष्टाचारबाट आर्जन भएको अख्तियारको दाबी छ ।
यो अवधिमा बस्नेतले जग्गा खरिद, घर निर्माण, अपार्टमेन्ट खरिद लगायतका विभिन्न सम्पत्ति जोडेको अनुसन्धानले देखाएको छ ।अख्तियारले उनीमाथि जग्गा खरिद बिक्रीमा कमिसन लिएको, छोराहरुको विवाहको भोजमा ठूलो गैरकानुनी रकम खर्च गरेको साथै व्यक्तिगत खर्चका नाममा छोराछोरीलाई रकम दिएको दाबी गरेको छ ।
अख्तियारले बस्नेतले घरमा काम गर्ने सहयोगीहरूलाई पनि गैरकानुनी रुपमा आर्जित रकमबाट तलब दिएको आरोप लगाएको छ । उनी मेयर भएपछि अस्वभाविक रूपमा सम्पत्ति आर्जन गरेको भन्दै अख्तियारले यसलाई सार्वजनिक पदको दुरुपयोगको संज्ञा दिएको छ ।
बस्नेतले लुकाएको र व्यवस्थापन गरेको सम्पत्तिको जिम्मेवारी पनि पत्नी उर्मिला बस्नेतले लिएको भन्दै अख्तियारले उनीविरुद्ध पनि मुद्दा दायर गरेको छ । यसअघि पनि बस्नेतमाथि गैरकानुनी रुपमा प्लटिङको काममा संलग्न रहेको, नगरपालिकाको स्रोतसाधन दुरुपयोग गरी फाइदा लिएको आरोपमा अख्तियारले भ्रष्टाचार मुद्दा दायर गरेको थियो ।
