डेली समाचारदाता
जनकपुरधाम, पुस २६ गते ।
विगत लामो समयदेखि दुबै मृगौला फेल भई उपचाररत रहेका २४ वर्षीय क्रिकेट खेलाडी कुन्दन सिंहको आज मृत्यु भएको छ ।
राष्ट्रियस्तरमा प्रदेश २ को तर्फबाट दर्जनौं यु(१९ क्रिकेट प्रतियोगिता खेलिसकेका कुन्दनको आज (आईतबार) बिहान मृत्यु भएको जिल्ला क्रिकेट संघ धनुषाका उपाध्यक्ष शोभाकान्त पाण्डेयले जानकारी दिए ।कुन्दनको मिर्गौलाले विगत लामो समयदेखि काम गर्न छोडेको थियो ।
महोत्तरीको जलेश्वर नगरपालिका फुलहट्टा घर भएका कुन्दनको मृगौला फेर्नुपर्ने चिकित्सकले धेरैदिन अघि नै सुझाव दिइसकेका थिए । तर आर्थिक अभावका कारण उनले आफ्नो मृगौला फेर्न सकेका थिएनन् । उनलाई तत्काल डायलायशिसमा राखिएको थियो ।
कुन्दनलाई सहयोग गर्न सरकारले चासो नदेखाएपछि जिल्ला क्रिकेट संघ धनुषाको अगुवाईमा जनकपुरमा ’कुन्दन बचाउ अभियान’ समेत चलाएर युवाहरुले करिव ७ लाख रुपैयाँ संकलन गरि कुन्दनको उपचारमा सहयोग पुर्याएका थिए ।
कुन्दनको निधनले क्रिकेट जगतमा अपुरणीय क्षति पुगेको जिल्ला क्रिकेट संघ धनुषाका उपाध्यक्ष शोभाकान्त पाण्डेयले बताए ।
